7 ივნისს, თბილისის დიდ საკონცერტო დარბაზში, თბილისის კულტურული ღონისძიებების ცენტრის მხარდაჭერით გაიმართება XX საუკუნის მეორე ნახევრის მსოფლიო საბალეტო ხელოვნების მეგა-ვარსკვლავის, ლეგენდარული მოცეკვავის, პედაგოგის, მსახიობისა და ქორეოგრაფის - მარის ლიეპას დაბადებიდან 75-წლისთავისადმი მიძღვნილი გალა-კონცერტი. კონცერტში მონაწილეობას მიიღებენ: დიდი თეატრის პრიმა-ბალერინა, მოდელი და მსახიობი, ქალბატონი ილზე ლიეპა, რუსეთის სახალხო არტისტი, საერთაშორისო თეატრალური პრემიების ლაურეატი და ჩვენი თანამემამულე, დიდი თეატრის პრემიერი, ცნობილი მოცეკვავე და ტელეწამყვანი, მსოფლიო საბალეტო ხელოვნების “ვარსკვლავი” ნიკოლოზ (ნიკა) ცისკარიძე, რომელიც აი უკვე 15 წელია არ გამოჩენილა ქართულ საბალეტო სცენაზე. 
გალა-კონცერტში ილზე ლიეპასა და ნიკა ცისკარიძესთან ერთად  მონაწილეობას მიიღებს ფრანგი მოცეკვავე და ქორეოგრაფი პატრიკ დე ბანა (Patrick de Bana), მორის ბეჟარის საბალეტო დასის Bejart Ballet-ისა (ლოზანა, შვეიცარია) და Compania Nacional de Danza-ს სოლისტი. თბილისელ მაყურებლებს ასევე საშუალება მიეცემათ საკონცერტო დარბაზის სცენაზე იხილონ დიდი თეატრის პრიმა-ბალერინები მარიანა რიჟკინა და ელენა ანდრიენკო, მარიინის თეატრის (სანქტ პეტერბურგი) სოლისტები ანდრეი ბატალოვი და ილია კუზნეცოვი, მოსკოვის კ.სტანისლავსკისა და ვლ.ნემიროვიჩ-დანჩენკოს სახელობის მუსიკალური თეატრის პრემიერი გიორგი სმილევსკი, პერმის პ.ჩაიკოვსკის სახელობის სახელმწიფო აკადემიური თეატრის სოლისტი ნატალია დომრაჩევა.

პროექტის მხარდამჭერია თბილისის კულტურული ღონისძიებების ცენტრი

პროექტის ფარგლებში წარმოდგენილი იქნება:

1. ექსპოზიციის გახსნა - თბილისის ვასო აბაშიძის სახელობის მუსიკალური კომედიისა და დრამის სახელმწიფო თეატრის ფოიე, 31 მაისი, 20:00 საათი

2. ფურშეტი და დოკუმენტური ფილმის ჩვენება - თბილისის ვასო აბაშიძის სახელობის მუსიკალური კომედიისა და დრამის სახელმწიფო თეატრის ბაღი, 31 მაისი, 20:00 საათი

3. გალა-კონცერტი - ფილარმონიის დიდი საკონცერტო დარბაზი, 7 ივნისი, 20:00 საათი

4. პრეს-კონფერენცია - თბილისის ვასო აბაშიძის სახელობის მუსიკალური კომედიისა და დრამის სახელმწიფო თეატრის ფოიე, 31 მაისი 19:30 საათი